اقولهم انتم اللى عملتوه ده استهلك جزء كبير من الرصيد اللى كان اصلا شبه خلصان و كده بقيتم بتسحبوا على المكشوف.قولهم ان اللى عملتوه في يوم واحد الشرطة معملتوش في سنين.اقولهم ظلم الشرطة كنا متعودين عليها و عارفين هم ايه و بيتعلموا ايه في الكلية بتاعتهم و بيتعلموا ايه في الاقسام، لكن ظلمكم و سفكم لدمائنا كانت بصراحة مفاجئة مذهلة لنا.اقولهم كنا فاكرين تدريباتكم و الافلام اللى بتعملوها و تنشروها على النت و الكلام اللى بيتقال عن العقيدة القتالية كنا فاكرينه موجه ناحية اسرائيل مش ناحية شوية عيال عزل.اقولهم، مبسوطين، حاسين بالسعادة و الانتصار و انتم شايفين صور و فيديوهات شباب في مقتبل العمر حاطين ايديهم على عيونهم و الدم نازل شلال منها بعد ما صفيتوها بسلاحكم
اقولهم هتيجوا اول الشهر الجاي تقبضوا، و تروحوا تشتروا أكل و شرب و لبس لكم و لعيالكم، افتكر و انت بترفع اللقمة لبقك ان اللقمة دي مليانة دم و حقد و كراهية و غل و صويت و صراخ اهالي الشهداء و المصابين. و لو قدرت تحط اللقمة في بقك يا ترى هتستطعمها ولا هتلاقي طعم الدم فيها.
اقولهم ملاحظين التعليقات على صفحتكم بقى شكلها ايه، اعملوا مقارنة سريعة بين تعليقات فبراير و نعليقات نوفمبر و انتم هتشوفوا وصلتم لأيه.
اقولكم هتروحوا النهاردة من الشغل و لما ابنك او بنتك تسألك عملت ايه في الشغل النهاردة هتقولها فقعت عين عشرين و قتلت عشرة علشان كانوا بيطالبوا بتحرير مصر من الهيمنة الامريكية، و بيطالبوا بوقف تصدير الغاز لاسرائيل و بيطالبوا بوقف استيراد المبيدات المسرطنة و بيطالبوا بتوفير فرص عمل و حرية و عدالة اجتماعية.
اقولهم انتم لما دخلتم الكلية الحربية كان نفسك تبقى سعد الدين الشاذلي، و لا طنطاوي ولا مبارك و لا الرفاعي ولا الجمسي ولا مين، افتكر انت كان نفسك تبقى ايه و بقيت ايه. بقيت موظف أو بالآصح بقيت زي قدرة. عارفه.
اقولهم، حاسين بالعزة و الكرامة و شوية شباب صغير طلعوا اجدع و ارجل منكم لما افرجوا عن ضابط الجيش و الاتنين العساكر اللى معاه و محدش انتقم منهم ولا كلمهم كلمة، مع انهم كانوا من دقائق شايفين انتوا بتعملوا ايه في الجثث و المغمي عليهم. شوية الشباب دول ما قتلوش ضباط الشرطة لما وقعوا تحت ايديهم في يناير بل بدلوا معاهم الهدوم علشان محدش يتعرض لهم مع انهم من دقيقة كانوا بيضربوهم و يدهسوهم بالعربيات اللى بفلوسنا. شوفوا بقه الشعب العادي اخلاقه ايه و انتم اخلاقكم ايه.
سمراء النيل