عبدالعزيز فتحي
"المجلس بيقول إنه مفيش ضرب بالغاز، و الشرطة قالت ضربنا مسيل للدموع فقط"
المجلس كداب، و الشرطة عذر أقبح من ذنب.. في ناس كتير ماتت من الغاز الجديد اللي تعمدوا يمسحوا البيانات من عليها ..و أنا و آلاف غيري اتبهدلوا منه
" قالوا بهاء اللي ضربته واحدة ست بمسدس"
اتنين من أصدقائي كانوا متواجدين مع بهاء في الوقفة أمام المديرية و أكدوا لى إنهم ضربوا رصاصتين واحدة جت في كتف واحد .. و التانية اخترقت رأس بهاء ..
" الناس بتقول إن اللي بيهجموا على المديرية في سموحة بلطجية"
هناك في كذا طرف في الموقع:
الثوار - الأمن المركزي - البلطجية- أهالى سموحة
و الحقيقية الثوار و البلطجية و أهالى سموحة لكل منهم نوعان
فيه ثوار واقفة معتصمة في الميدان، و ثوار تانيين في شارع المديرية بيصدوا هجمات الأمن ومش بيهجموا على المديرية
و فيه بلطجية مع الأمن، تقدروا تشوفوهم كويس في الفيديوهات بيضربوا معاهم و يقبضوا على المتظاهرين، و في ناس بلطجية واقفين في صف الثوار و بيضربوا و يهجموا على الأمن (و ده للأمانة لأني اتعاملت و اتكلمت مع كذا واحد منهم النهاردة في ناس جاية على ضرب)
بالنسة للأهالى في ناس نازلة بتتكلم مع الناس و تحاول تمنعهم من الاشتباك مع الأمن و البقاء في الميدان، و أهالى تانية واقفة مع الأمن بتضرب أى حد يقرب سواء ثوار أو بلطجية
- - - - - - - - - - - - -
ديه كدة نظرة سريعة لبعض الحقائق اللى تحققت منها و شوفتها بعيني، و أحب أضيف تحليل متواضع جدا للأمور
مبدئياً هو ليه العنف حلال للشرطة و الجيش في حين إنه حرام و كخة للمتظاهرين ؟ بصراحة مش لاقي تفسير منطقي للموضوع ده، أنا شايف إن العنف بيولد عنف.. احنا ثورتنا شالت مبارك بسلميتها، بس الثورة يتم الاعتداء عليها بلاش نضحك على نفسنا لا مفر من المقاومة، صحيح حقن الدماء هدفنا و لكن المقاومة قائمة للحفاظ على كرامة الشعب و إثبات وجودهم و عدم استسلامهم، مش كل اللي اتضربوا أو مات لهم حد ينفع يكملوا المقاومة بسلمية، لو عقولهم سمحتلهم من الصعب إن ضمائرهم و كرامتهم تسمحلهم.
المجلس في إيديه يوقف المهازل و المجازر اللي حاصلة في كل المحافظات، يفصل ما بين الشرطة و الثوار لأن العنف ما بينهم لن يتوقف نظرا لوجود عنصر البلطجية لدى الطرفين و اللي دايما يميل إلى العنف.
طيب بالنسبة للبلطجية، هما مين البلطجية دول؟ و أنا عاوزكوا تبصوا معايا بزاوية مختلفة للناس ديه اللي عددهم كبير و نشاطهم بيختلف حسب توجهاتهم.
،ديه ناس شكلها بالنسبة لأغلب الناس "غلط و لبش" و ده بحكم المظهر و ديه خلقة ربنا و ظروف معيشتهم اللي حكمت بكده.
الناس ديه طبقة و فئة لا تتجزأ من المجتمع و اللي ما ينفعش نتبرى منهم لمجرد إنهم برضه نظرا لظروفهم بقوا جهلة غير متعلمين و أغلبهم لجأ للإنحراف و البلطجة.
معلومة هامة اللي بنسيمهم بلطجية دول زي ما كان في منهم بيسرقوا أيام 28 يناير في منهم وقف قدام الرصاص و القنابل.
ضد الظلم و الفساد اللي وراهم و دوقهم المر
طيب هو أنا عاوز أوصل إيه بعد كل الكلام ده ؟
أحكموا على الناس بالعقل و بعد التعرف على غايتهم و أهدافهم، اللى بينزل الميادين بينزل أرض الواقع مش جزيرة الفساد المكونة من الإعلام و الحكم العسكري المصرطن.
أنا أرى إن المجلس سايب طوائف الشعب المكونة من الثوار ، الأهالى، عساكر الشرطة و الجيش و البلطجية يقتلوا في بعض ! ما الهدف ؟ أنا لا أجزم إني أعرف لكن أنا واثق إنه يقدر يمنع تلك المجازر .. و هذا السبب يكفيني عشان أنزل و أهتف و أقول بكل ثقة
يسقط .. يسقط حكم العسكر !!